1. Бош сахифа
2. Янгиликлар

Фарғона тумани ҳокими Иномов Хамидулло Таджиевичнинг Ўзбекистон Республикаси Давлат Мустақиллигининг 33 йиллик байрамига табриги

×

Ассалому-алайкум қадрли тумандошлар!

Барчамиз учун энг улуғ ва энг азиз бўлган байрамимиз истиқлолимизнинг 33 йиллик тантанасини юксак кўтаринкилик ва шоду-хуррамлик билан нишонламоқдамиз.

Мана шу шукуҳли дамларда ҳар қандай шароитда ҳам ўз касбига содиқ қолиб, ёш авлодимизга илм-фан асосларини ўргатиб келаётган ҳурматли муаллим ва мураббийларни, халқ саломатлиги йўлида ўзини аямасдан хизмат қилаётган жонкуяр шифокорларни, эл-юрт дастурхонини янада тўкин қилиш учун далаларимизда фидокорона меҳнат қилаётган миришкор деҳқон ва фермерларимизни, она юртимиз қалқонлари бўлган жасур ҳарбийларимизни, иқтисодиётимиз ривожи, туманимиз халқини фаровонлигини ошириш йўлида жонбозлик кўрсатаётган тадбиркорларимизни, ўзининг дастлабки ютуқлари билан барчамизни хурсанд қилаётган шижоатли ёшларимизни, улуғ фазилатлари билан хонадонларимиз устуни бўлиб келаётган ҳурматли опа-сингилларимизни, ҳар бир ишда дуогўй бўлиб, бизга Яратгандан куч ва мадад тилаб турган муҳтарам отахон ва онахонларимизни, бир сўз билан айтганда, Фарғона туманининг кўп миллатли халқини улуғ байрам билан чин қалбимдан самимий табриклайман.

Ҳурматли дўстлар!

Ўттиз уч йиллик мустақил тараққиёт даврида ватанимизда яшаётган барча халқлар ва миллатлар вакиллари ўртасида тинчлик, дўстлик ва ўзаро англашув сақланиб қолгани жамиятда алоҳида эътирофга сабаб бўлаётганли бу қаторда Фарғона тумани кесимида қўшни давлат билан ўзаро алоқаларнинг тоборо яхшиланаётганлиги икки халқ фуқаролари учун янги шарт-шароитлар, янги имкониятлар дарвозаси кенг очилаётганлиги албатта бизларни қувонтиради. Муҳтарам Президентимизнинг Фарғона вилоятига ташрифи давомида Фарғона туманининг Водил, Аввал, Шоҳимардон қишлоқларига алоҳида эътибор ва урғу бериб туризм зонасига айлантириш бу борада барча имкониятларни ишга солиш ва қишлоқ хўжалиги соҳасида 200 гектар ер майдонига малиначилик кластери ташкил этиш тўғрисида старт берганлари биз туман фарзандларига алоҳида ғурур бағишлади. Албатта, бундай масъулятли вазифаларни туман аҳли билан бир бўлиб аҳилликда амалга ошириш барчамизга насиб қилсин. Бундан ташқари Париж шаҳрида ўтказилган олимпиада ўйинларида ватанимиз шарафини муносиб ҳимоя қилган фарзандларимиз орасида Фарғона туманининг ўғлони Лазизбек Муллажонов олтин медални қўлга киритиб Ўзбекистон фахрига айланди шу муносабат билан Лазизбекни яна бир бор бутун туман аҳолиси номидан чин юракдан табриклаймиз келгусида ҳам жаҳон спорт ареналарида ғолибликни қўлга киритишига тилакдошмиз.

Қадрли тумандошлар!

Ўзбекистон халқи мустақиллик неъматидан баҳраманд бўлиб, ҳеч кимдан кам бўлмаган буюк давлат, одил фуқаролик жамияти барпо этиш йўлида ишонч билан бораётганига мана 33 йил бўлди.

Бугунги фаровон, обод ва эркин ҳаётга осонлик билан эришмаганимизни кекса-ю-ёш яхши билади.

Шундай экан Мустақиллигимизнинг қадрига етишимиз, уни асраб-авайлашимиз ва янада мустаҳкамлашимиз, келажак авлодга ўзимиздан озод ва обод Ватан қолдиришимиз ҳар биримизнинг буюк инсоний бурчимиз, улуғ ва эзгу ниятимиздир.

Ҳурматли тумандошлар ва азиз меҳмонлар!

Озод ва обод Ватанимизда байрам шукуҳи кезаётган ушбу тароватли кунларда
“Бир бўлсак - ягона халқмиз, бирлашсак -Ватанмиз!” деган эзгу ғояни ўзида мужассам этган истиқлолимизнинг 33 йиллик қутлуғ тўйи билан яна бир бор кўп миллатлик туманимиз аҳолисини чин юракдан табриклайман.

Мамалакатимиздаги тинчлик-осойишталик бардавом бўлишини тилайман.

Мустақиллигимиз абадий бўлсин!