Farg‘ona viloyatida 2025-yil 20-maydan 20-iyungacha davom etadigan “Dolzarb 30 kun” yong‘in xavfsizligi tadbiri doirasida aholi xavfsizligini ta‘minlash borasida bir qator amaliy ishlar olib borilmoqda. Xususan, Farg‘ona tumani Favqulodda vaziyatlar bo‘limi xodimlari tomonidan yoz mavsumini tinch va betalofat o‘tkazish, aholining salomatligini muhofaza qilish maqsadida profilaktik tadbirlar tizimli ravishda amalga oshirilmoqda. Tadbirlar davomida yong‘inlar, botulizm, suvda cho‘kish kabi ko‘ngilsiz holatlarning oldini olishga alohida e‘tibor qaratilmoqda. Shu munosabat bilan tumandagi ijtimoiy soha obektlari, jamoat joylari, masjidlar hamda aholi ko‘p tashrif buyuradigan cho‘milish havzalarida keng qamrovli tushuntirish ishlari olib borilmoqda. Mutaxassislar tomonidan xavfsizlik qoidalari bo‘yicha targ‘ibot va nazorat ishlari kuchaytirilgan, aholiga tushunarli va amaliy tavsiyalar berilmoqda.