Elektromobil bozorini qisish uchun oxirgi bir yilda nimalar qilindi?

Yil boshidan beri elektromobillar importi uchun ketma-ket to‘siqlar yaratib kelinmoqda. Va bu – elektromobillarni mahalliylashtirish boshlangani fonida yuz beryapti. Jismoniy shaxslar nomidan tijorat maqsadida avtomobil olib kirish taqiqlanishi, sertifikatlash narxining oshishi va qiyinlashtirilishi, elektromagnit tekshiruvi kabilarning joriy qilinishi ichki bozorda elektrokar narxlarini sezilarli qimmatlashtirdi.

Ko‘plab rivojlangan mamlakatlar potensial ekologik muammolarning oldini olish maqsadida ichki yonuv dvigatellarida ishlaydigan mashinalardan asta-sekin voz kechib, elektr toki bilan quvvatlanadigan avtomobillardan foydalanishga urg‘u beryapti.

Bu borada O‘zbekistonda ham yaxshi tendensiya kuzatildi. Bu xorijdan elektromobil import qilishning arzonlashtirilgani bilan ham bog‘liq edi. Xususan, 2019 yil 1 yanvardan O‘zbekistonga elektromobil importi uchun boj to‘lovi bekor qilingan, o‘sha yil iyul oyiga borib aksiz solig‘i ham olib tashlangandi.