Farg‘ona tuman sudida muhim jinoyat ishi ko‘rib chiqildi. Sud qaroriga ko‘ra, bir guruh shaxslar – A.T., D.M., I.T. va Sh.Q. O‘zbekiston Respublikasining Jinoyat kodeksida belgilangan tartibda, noqonuniy ravishda davlat chegarasini kesib o‘tishga uringani uchun aybdor deb topildi. Ularning ayrimlari jinoyatni o‘zaro til biriktirib sodir etgan bo‘lsa, boshqalari bevosita jinoyatga qo‘l urgan. Mazkur harakatlar Jinoyat kodeksining 223-moddasi 2-qismi «b» va «v» bandlariga mos keladi. Sud har bir ishtirokchiga 3 yillik ozodlikdan mahrum qilish jazosi tayinladi. Sh.Q. esa avvalgi jinoyati bo‘yicha o‘talmay qolgan jazosi inobatga olinib, jami 3 yil 1 oy muddatga qamaldi. Ayrim sudlanuvchilar garov asosida vaqtincha ozodlikda bo‘lgan bo‘lsada, sud qaroriga binoan ular zudlik bilan sud zalidan qamoqqa olindi. Sud qarori kuchga kirgach, ularning garov pullari yaqin qarindoshlariga qaytarilishi belgilandi. Ish doirasida ashyoviy dalil sifatida musodara qilingan “Labo“ avtomobili va ekraniga shikast etgan “Smart Q90“ televizori esa davlat foydasiga musodara qilindi. Bu holat davlatimizning qonun ustuvorligi, hech bir fuqaro yoki guruh qonundan yuqori emasligini yana bir bor tasdiqlaydi. Ayniqsa, davlat chegarasini noqonuniy kesib o‘tishga urinish — bu nafaqat qonunni buzish, balki milliy xavfsizlikka qarshi tajovuz hisoblanadi. Bunday jinoyatlarga nisbatan davlat qat‘iy pozisiyada: qonunbuzarlik jazolanadi, Vatan daxlsizligi esa har qanday sharoitda himoya qilinadi.