Fargʻona tumanida xodimlarning huquqiy savodxonligini oshirish va ularning mehnat huquqlarini yanada chuqurroq anglashlariga yordam berish maqsadida navbatdagi davra suhbati tashkil etildi. Tadbir Fargʻona tuman adliya bo‘limi YHXK (Yuridik-huquqiy konsultatsiya markazi) xodimlari tashabbusi bilan “Mehnat huquqingizni bilasizmi?” mavzusida oʻtkazildi. Mazkur davra suhbati 55-sonli davlat maktabgacha ta’lim tashkiloti hamda 8-maktabda boʻlib oʻtdi. Unda xodimlarga so‘nggi yillarda qabul qilingan normativ-huquqiy hujjatlar, ularning mazmun va mohiyati batafsil tushuntirib berildi. Shuningdek, mehnat qonunchiligiga oid asosiy masalalar – xodimlarning huquqlari va majburiyatlari, ish haqi, dam olish kunlari, mehnat shartnomalari, kasaba uyushmalari bilan bogʻliq jihatlar atroflicha muhokama qilindi. Davra suhbati qizgʻin savol-javoblar tarzida kechdi. Ishtirokchilar oʻzlarini qiziqtirgan savollarni berib, huquqshunoslardan batafsil javob olish imkoniyatiga ega boʻldilar. Tadbir yakunida xodimlarda mehnat huquqlari toʻgʻrisida xabardorlikni oshirish, ularning huquqiy madaniyatini shakllantirish va ish joylarida qonuniy tartib-qoidalarga rioya etish masalalari bo‘yicha muhim tavsiyalar berildi. Shu tarzda oʻtkazilgan o‘quv-muloqotlar natijasida xodimlar nafaqat o‘z huquq va majburiyatlarini yaxshiroq anglab oldilar, balki kelgusida zarur hollarda ularni amalda himoya qilish imkoniyatiga ham ega bo‘ldilar.