O‘zbekiston tumanida ipak qurtini parvarishlash mavsumi boshlandi. Joriy mavsumda tuman pillakorlari 3652 quti ipak qurti urug‘larini parvarishlab, jami 219 tonna “kumush tola” yetishtirishni ko‘zlagan. Shu maqsadda tumandagi 10 ta hududda tashkillangan 8 ta inkubatoriyga ipak qurti urug‘lari qo‘yildi. “Yaypan agro pilla” MCHJ va “Nurli tong silk” pillachilik klasteri tomonidan ipak qurti urug‘larini jonlantirish, yangi texnologiyalar asosida parvarishlash va aholi bandligini ta’minlash ishlariga alohida e’tibor qaratilmoqda. Yaqin o‘n kun ichida jonlangan ipak qurtlarini parvarishlash uchun mirishkor pillakorlarga tarqatish rejalangan. Ta’kidlanishicha, bu yil ipak qurti parvarishi uchun tuman bo‘ylab 1 ming 500 dan ziyod ipak qurti boquvchi oilalar va 150 dan ziyod fermer xo‘jaliklari bilan ichki shartnomalar tuzilgan.