Farg‘ona tumanida turizm salohiyatini rivojlantirish, Shohimardon va Yordon qishloqlari, Vodil, Avval va Chimyon shaharchalarining master rejasini ishlab chiqish jarayonlari bilan tanishish maqsadida mahalliy bloggerlar va media sohasi vakillari ishtirokida press-tur tashkil etildi. Tadbir davomida chet ellik va mahalliy sayyohlarga xizmat ko‘rsatuvchi mehmonxonalar faoliyati o‘rganildi. Shuningdek, sayohat va ziyorat turizmi doirasida tuman markazidagi “Chinor tagi“ dam olish va istirohat bog‘i hamda uning sayyohlar uchun yaratilgan sharoitlari bilan tanishildi. Mazkur bog‘ hududida joylashgan ming yillik chinor va “Xo‘ja Ahmad Valiy“ maqbarasi ziyoratgohlari sayyohlarni jalb etishda muhim rolь o‘ynashi ta‘kidlandi. Ma‘lumotlarga ko‘ra, ayni paytda Farg‘ona tumanining turizm salohiyatini oshirish bo‘yicha Shohimardon, Yordon, Vodil, Avval va Chimyon hududlarining master rejalari ishlab chiqilib, mazkur rejalar bo‘yicha aholi orasida so‘rovnomalar o‘tkazilmoqda. Press-tur davomida shuningdek, Vodil MFY hududida eskirgan turar joy binolarini buzish va ularning o‘rnida zamonaviy 7 qavatli turar joy binolari qurish (renovasiya) bo‘yicha amalga oshirilayotgan loyihalar haqida blogger va jurnalistlarga tushuntirish berildi. Ushbu ishlar hududiy infratuzilmani yaxshilash, zamonaviy turizm sharoitlarini yaratish va yashash sifatini oshirishga xizmat qilishi qayd etildi. Mazkur tashabbuslar Farg‘ona tumanini mintaqaning yirik turistik markazlaridan biriga aylantirish va chet ellik sayyohlarni ko‘proq jalb etish yo‘lidagi muhim qadamlardan biri hisoblanadi.