“Kitobxonlik haftaligi” doirasida Farg‘ona tumani axborot-kutubxona markazi xodimlari tomonidan uyushmagan aholi o‘rtasida “Qanday kitoblarni o‘qishni xohlaysiz?” mavzusida so‘rovnoma o‘tkazildi. Mazkur tadbir aholi orasida kitobxonlik madaniyatini yanada rivojlantirish, ularning qiziqishlari va ehtiyojlarini aniqlash maqsadida tashkil etildi. So‘rovnomada asosan xotin-qizlar va yoshlar faol ishtirok etdilar. Ishtirokchilarning ta‘kidlashicha, ular bo‘sh vaqtlarida badiiy adabiyotlar bilan bir qatorda ilmiy-ommabop kitoblarni ham mutolaa qilishga qiziqish bildiradilar. Ular zamonaviy ilm-fan yangiliklari, shaxsiy rivojlanish, tarix va psixologiyaga oid kitoblar bo‘yicha ham takliflar bildirdilar. So‘rovnoma natijalari asosida axborot-kutubxona markazida kitob fondini boyitish, aholining kitob mutolaasiga bo‘lgan ehtiyojlarini qondirish hamda ma‘naviy-ma‘rifiy tadbirlar samaradorligini oshirish yuzasidan tegishli chora-tadbirlar belgilanishi rejalashtirilmoqda.