Farg‘ona tumani Ichki ishlar bo‘limi Yo‘l harakati xavfsizligi bo‘limi tomonidan yo‘l infratuzilmasini yaxshilash va harakat ishtirokchilari xavfsizligini ta‘minlash maqsadida navbatdagi amaliy ishlar amalga oshirildi. Xususan, Farg‘ona tumanidan o‘tuvchi D-090 «Farg‘ona shahri – Vodil qishlog‘i» yo‘nalishidagi katta avtomobilь yo‘lida yo‘l chiziqlari yangilab chizildi. Bu esa haydovchilar uchun harakat yo‘nalishlarini aniq ko‘rsatishga va avariyaviy holatlarning oldini olishga xizmat qilmoqda. Shuningdek, yo‘lning chetki qismlarida joylashgan, yaroqsiz holga kelgan va ko‘rinishi yomonlashgan yo‘l belgilari zamonaviy va aniq ko‘rinishga ega bo‘lgan yangilariga almashtirildi. Mazkur chora-tadbirlar yo‘l harakati ishtirokchilari – haydovchi va piyodalarning xavfsizligini ta‘minlash, yo‘l-transport hodisalarining oldini olishda muhim ahamiyat kasb etmoqda. Farg‘ona tumani YHXB tomonidan bu boradagi ishlar bosqichma-bosqich davom ettirilmoqda.