Farg‘ona tumani hokimligida Xalq deputatlari tuman Kengashi huzuridagi doimiy komissiyalarning navbatdagi qo‘shma yig‘ilishi bo‘lib o‘tdi. Unda hududda amalga oshirilayotgan bir qancha muhim chora-tadbirlar ijrosi muhokama qilindi. Yig‘ilishda O‘zbekiston Respublikasi Prezidentining joriy yildagi qarorlariga asosan huquqbuzarliklarning oldini olish, xavfsiz muhitni yaratish, oilaviy tadbirkorlikni qo‘llab-quvvatlash, energiya resurslaridan samarali foydalanish hamda ta‘lim tizimini takomillashtirish borasida olib borilayotgan ishlar yuzasidan mas‘ullar axborot berdi. Shuningdek, tumandagi yo‘l harakati xavfsizligini ta‘minlash, egallab olingan erlar holatini tartibga solish, yoshlarga oid davlat siyosati amalga oshirilishi, jamoatchilik asosidagi tadbirlarni moliyalashtirish hamda adliya bo‘limi faoliyati to‘g‘risida ham hisobotlar tinglandi. Yig‘ilish davomida barcha masalalar atroflicha muhokama qilinib, tegishli qarorlar qabul qilindi hamda navbatdagi sessiya kun tartibiga kiritilishi lozim bo‘lgan mavzular belgilandi.