Yaqinlashib kelayotgan Oʻzbekiston Respublikasi Mustaqilligining 34 yillik bayrami arafasida Fargʻona tumani “Boʻston” mahallasi fuqarolari uchun quvonchli voqea yuz berdi. Ushbu mahalla fuqarolar yigʻini yangi binosi tantanali marosimda foydalanishga topshirildi. Tadbirda Fargʻona tumani hokimi Xamidullo Inomov, korxona va tashkilot rahbarlari, mahalla faollari hamda jamoatchilik vakillari ishtirok etdilar. Yangi mahalla fuqarolar yigʻini binosi davlat-xususiy sherikchiligi asosida “Ayub Ali Fayz” MChJ tomonidan 1 milliard 300 million soʻm tadbirkor mablagʻlari hisobidan bunyod etildi. Zamonaviy tarzda qurilgan 3 qavatli binoning bir qismi mahalla yettiligi aʼzolari uchun xizmat xonalari sifatida ajratildi. Binoning qolgan qismidan esa aholining bandligini taʼminlash, ularning boʻsh vaqtini mazmunli oʻtkazish hamda ijtimoiy-maʼnaviy faoliyatlarni yoʻlga qoʻyish maqsadida foydalanish rejalashtirilgan. Mazkur tashabbus davlat va xususiy sektor hamkorligining amaliy ifodasi boʻlib, mahallalarda zamonaviy sharoitlarni yaratish, fuqarolarning turmush darajasini yanada oshirishga xizmat qiladi. Shu bilan birga, ushbu yangilik Mustaqillik bayrami shukuhini yanada yuksaltirib, “Boʻston” mahallasi aholisi uchun qoʻshaloq bayram boʻldi.