Yurtimizda mahalla institutini yanada mustahkamlash, fuqarolar oʻzini oʻzi boshqarish organlari faoliyatini qoʻllab-quvvatlash hamda aholining turmush sharoitini yaxshilash borasida keng koʻlamli islohotlar amalga oshirilmoqda. Mustaqillik bayrami arafasida amalga oshirilayotgan bunyodkorlik ishlari barchamizning farovon hayot sari intilishlarimizning amaliy ifodasi boʻlib xizmat qilmoqda. Shu maqsadda Fargʻona tumanida ham yurtimiz taraqqiyoti va yangi davr talablariga mos bunyodkorlik ishlari izchil davom ettirilmoqda. Jumladan, davlat xususiy sherikchiligi asosida “Kaptarxona farovon qurilish” MChJ tomonidan 900 million soʻm tadbirkor mablagʻlari hisobidan barpo etilgan va foydalanishga topshirilgan 2 qavatli bino “Kaptarxona” hamda “Mehnatobod” mahalla fuqarolar yigʻinlari uchun xizmat qiladi. Tantanali ochilish marosimida Fargʻona tumani hokimi Xamidullo Inomov, mutasaddi tashkilotlar rahbarlari, mahalla faollari hamda keng jamoatchilik vakillari ishtirok etdilar. Yangi binoning birinchi qavati “Kaptarxona” mahallasi yettiligi aʼzolari uchun xizmat xonalari sifatida ajratilgan boʻlsa, ikkinchi qavatida “Mehnatobod” mahallasi yettiligi faoliyat yuritadi. Ushbu tashabbus aholining ijtimoiy faolligini oshirish, mahalla tizimini mustahkamlash va aholiga ko‘rsatiladigan xizmatlar sifatini yanada yaxshilashga xizmat qiladi. Mazkur loyiha “Yangi Oʻzbekiston – yangi mahalla” tamoyilining amaliy ifodasi boʻlib, u nafaqat mahalla hayotida ijtimoiy birlik va hamjihatlikni kuchaytiradi, balki Mustaqillikning 34 yillik tantanalari arafasida xalqimizga yanada quvonch va faxr bagʻishlaydi.