Xalq deputatlari Farg‘ona tuman Kengashi deputati Bahodir Ahmadjonov hamkor tashkilotlar vakillari bilan birgalikda tumandagi “Soy bo‘yi” mahalla fuqarolar yig‘ini hududida joylashgan 44-sonli maktabgacha ta’lim muassasasida bo‘lib, 2025–2026-yillar kuz-qish mavsumiga tayyorgarlik jarayonlarini o‘rgandi. Tekshiruv davomida muassasadagi isitish tizimlari, qozonlarning texnik holati, yoqilg‘i zaxiralari, shuningdek, xonalarning mavsumga tayyorligi atroflicha ko‘zdan kechirildi. Shu bilan birga, energiya tejamkorlikni ta’minlash va bolalar uchun qulay muhit yaratish masalalari ham tahlil etildi. O‘rganish natijasida aniqlangan ayrim kamchiliklarni bartaraf etish bo‘yicha mas’ullarga tegishli tavsiyalar berildi. Deputat Bahodir Ahmadjonov muassasa rahbariyatiga kuz-qish mavsumini muammosiz o‘tkazish, isitish tizimlarining uzluksiz va samarali ishlashini doimiy nazoratda ushlab borish zarurligini ta’kidladi.