Mamlakatimizda “Tozalik va ozodalik oyligi” keng ko‘lamda o‘tkazilmoqda. Mazkur tashabbus doirasida turli hududlarda obodonlashtirish va ekologik aksiyalar tashkil etilmoqda. Ana shunday ezgu ishlarga hamohang tarzda, Farg‘ona tumani Yoshlar ishlari bo‘limi tashabbusi bilan “Obod yurt” plogging ekologik aksiyasi o‘tkazildi. Tadbirda mahalla yoshlar yetakchilari hamda faol yoshlar “Yuqori Vodil” mahalla fuqarolar yig‘ini hududida tozalash ishlarini amalga oshirdilar. Aksiya davomida hudud chiqindilardan, yovvoyi o‘t-o‘lanlardan va xazon barglaridan tozalandi, daraxtlar oqlandi, atrof-muhitga e’tibor va hurmat ruhi keng targ‘ib qilindi. Farg‘ona tumanida o‘tkazilayotgan bunday ekologik tashabbuslar yoshlarning ijtimoiy faolligini oshirish, ekologik xavfsizlikni ta’minlash hamda “Yashil makon” umummilliy loyihasiga munosib hissa qo‘shish yo‘lida muhim ahamiyat kasb etmoqda.