Farg‘ona tumani Maktabgacha va maktab ta’limi bo‘limi tasarrufidagi 38-sonli umumiy o‘rta ta’lim maktabida “San’atga oshno qalblar” shiori ostida musiqali-badiiy kecha tashkil etildi. Tadbir yosh avlodning milliy madaniyatga bo‘lgan qiziqishini kuchaytirish, ularni milliy san’at ruhida tarbiyalashga qaratildi. Mazkur kechaning asosiy maqsadi o‘sib kelayotgan yoshlarning milliy ashulalarimiz, an’anaviy kuy-qo‘shiqlar hamda milliy cholg‘u asboblariga bo‘lgan mehrini yanada oshirish, ularning estetik didini shakllantirishdan iborat bo‘ldi. Tadbir davomida o‘quvchilar tomonidan ijro etilgan kuy-qo‘shiqlar, sahna ko‘rinishlari va turli musiqiy chiqishlar yig‘ilganlarga ko‘tarinki kayfiyat ulashdi. Tadbir ishtirokchilari — o‘qituvchi va o‘quvchilar mazmunli va maroqli dam olib, milliy san’atning go‘zal namunalari bilan yaqindan tanishish imkoniga ega bo‘ldilar.