Vatan himoyasi har bir fuqaroning muqaddas burchi hisoblanadi. Yosh avlod qalbida ona yurtga sadoqat, milliy g‘urur va mas’uliyat tuyg‘ularini mustahkamlash maqsadida yurtimiz bo‘ylab “Milliy armiya — ona yurt qalqoni, tinchligimiz posboni” shiori ostida “Harbiy-vatanparvarlik oyligi” keng nishonlanmoqda. Ushbu oylik doirasida tashkil etilgan “Ochiq eshiklar kuni” tadbirlari muhim ahamiyat kasb etmoqda. Mazkur tadbirlar doirasida Farg‘ona tumanida joylashgan 4-sonli umumta’lim maktabida tumanda joylashgan O‘zbekiston Respublikasi DXX Chegara qo‘shinlariga qarashli harbiy qism harbiy xizmatchilari tomonidan ma’naviy-ma’rifiy tadbir tashkil etildi. Tadbir davomida ishtirokchilar Chegara qo‘shinlarining kundalik faoliyati, harbiy xizmatchilar hayoti, xizmat sharoitlari hamda ushbu tizimda amalga oshirilayotgan islohotlar bilan yaqindan tanishish imkoniyatiga ega bo‘ldilar. Harbiy kiyim-boshlar, maxsus anjomlar va texnik vositalar namoyishi tadbirga alohida qiziqish bag‘ishladi. “Ochiq eshiklar kuni” doirasida harbiy xizmatchilar tomonidan harbiy xizmatning mazmun-mohiyati, uning sharafli va mas’uliyatli jihatlari haqida batafsil tushuntirishlar berildi. Yoshlar o‘zlarini qiziqtirgan savollarga atroflicha javoblar olib, harbiy sohaga bo‘lgan qiziqishlarini yanada oshirdilar.