Qurolli Kuchlar tashkil topganligining 34 yilligi hamda 14-yanvar — Vatan himoyachilari kuni munosabati bilan Farg‘ona tumani 24-umumiy oʻrta taʼlim maktabida “Uch avlod uchrashuvi” nomli ma’naviy-ma’rifiy tadbir tashkil etildi. Mazkur tadbirda O‘zbekiston Respublikasi DXX Chegara qo‘shinlari faxriylar kengashi a’zolari, amaldagi ofitserlar, serjantlar, oddiy askarlar hamda o‘quvchi yoshlar ishtirok etdilar. Tadbirning asosiy maqsadi yosh avlod qalbida vatanparvarlik tuyg‘ularini mustahkamlash, harbiy xizmatga bo‘lgan hurmatni oshirish va avlodlar o‘rtasidagi ma’naviy bog‘liqlikni kuchaytirishdan iborat bo‘ldi. Tadbir doirasida Chegara qo‘shinlari faxriylari va yoshlar ishtirokida davra suhbatlari, mahorat darslari hamda sportning shaxmat va shashka turlari bo‘yicha musobaqalar yuqori saviyada tashkil etildi. Shuningdek, faxriylar hozirgi kunda maktablarda o‘quvchilar uchun zamonaviy texnologiyalar asosida yaratilayotgan shart-sharoitlar bilan yaqindan tanishdilar. Tadbir davomida so‘zga chiqqan faxriylar va harbiy xizmatchilar o‘z hayotiy tajribalari, Vatanga sadoqat, jasorat va fidoyilik haqidagi samimiy fikr-mulohazalari bilan yoshlar qalbida vatanparvarlik hissiyotlarining yanada kuchayishiga zamin yaratdilar.