O‘zbekiston Respublikasi davlat mustaqilligining o‘ttiz to‘rt yilligi munosabati bilan Farg‘ona tumanida yurtimizning eng ulug‘ va eng aziz bayrami keng nishonlanmoqda. “Vatan uchun, millat uchun, xalq uchun” shiori ostida tashkil etilgan tantanali tadbirda “Turon maktab teatri” hamda “Iqtidor maktab ansambli” tuman bosqichlarida g‘oliblikni qo‘lga kiritgan maktab jamoalari o‘zlarining badiiy chiqishlari bilan yig‘ilganlarga bayramona kayfiyat ulashdi. Tadbir Farg‘ona tumani Maktabgacha va maktab ta’limi bo‘limi hududidagi ochiq maydonda bo‘lib o‘tdi. Unda davlat va jamoat tashkilotlari vakillari, ustoz-murabbiylar, ota-onalar hamda keng jamoatchilik ishtirok etdi. Dastlab, Farg‘ona tumani hokimining Ma’naviy-ma’rifiy ishlar samaradorligini oshirish, davlat tili to‘g‘risidagi qonun hujjatlariga rioya etilishini ta’minlash masalalari bo‘yicha maslahatchisi Maftunaxon Obidova hamda Farg‘ona tumani Maktabgacha va maktab ta’limi bo‘limi boshlig‘i Shavkatjon Yuldashev so‘zga chiqdi. Taqdirlov nutqlarida ta’kidlanganidek, ushbu tanlovlar o‘quvchi-yoshlarning ijodiy qirralarini namoyon etishda, ularning iqtidorini yuzaga chiqarishda muhim o‘rin tutmoqda. Sahnadagi jonli va samimiy chiqishlar esa tomoshabinlar qalbida cheksiz faxr va g‘urur tuyg‘ularini uyg‘otdi. Nutq so‘zlovchilar yosh ijodkorlarni keyingi faoliyatlarida ham yuksak marralarni zabt etishga da’vat etib, barchani yaqinlashib kelayotgan Mustaqillik bayrami bilan qizg‘in tabrikladilar. Tadbir davomida Vatan ravnaqi, xalqimiz tinchligi va farovonligi yo‘lida mehnat qilayotgan yosh avlodning fidoyiligi, ularning ezgu niyat va orzulari alohida e’tirof etildi.