Farg‘ona tumanida yosh avlodning texnologik salohiyatini oshirishga qaratilgan “Raqamli avlod qizlari” tanlovining taqdirlash marosimi bo‘lib o‘tdi. Mazkur tanlov zamonaviy texnologiyalarni puxta egallagan, bilimli va iqtidorli yosh qizlarni aniqlash hamda ularni qo‘llab-quvvatlashga qaratilgan muhim tashabbus sifatida e’tirof etildi. Tadbirda Farg‘ona tuman hokimi o‘rinbosari Ilhomjon Toshpo‘latov hamda tuman Maktabgacha va maktab ta’limi bo‘limi boshlig‘i Shavkatjon Yuldashev ishtirok etishdi. Ular g‘olib bo‘lgan o‘quvchilarga diplom va esdalik sovg‘alarini tantanali ravishda topshirdilar. Marosim davomida yoshlar tomonidan o‘z sohalarida raqamli texnologiyalarni qo‘llash, innovatsion fikrlash va ijodiy yondashuv yo‘nalishlaridagi yutuqlar namoyish etildi. Tadbir ishtirokchilari “raqamli avlod” vakillari — bugungi yosh qizlar zamonaviy jamiyatda o‘z o‘rniga ega bo‘lgan, texnologiyalarni hayotga tatbiq etish orqali mamlakat taraqqiyotiga munosib hissa qo‘shayotgan yoshlar ekanini alohida ta’kidlashdi.