“Tadbirkorlikni rivojlantirish kompaniyasi” AJning mavjud xizmatlari hamda 2024–2025 yillarda qabul qilingan PQ–103, PF–70, PF–71, PF–138, PF–176, PF–181, PQ–322-sonli qaror va farmonlarda tadbirkorlar uchun nazarda tutilgan imtiyozlardan samarali foydalanish masalalari yuzasidan Farg‘ona tumanida ochiq muloqot bo‘lib o‘tdi. Uchrashuvda tuman hokimining birinchi o‘rinbosari, O‘zbekiston Savdo-sanoat palatasi Farg‘ona vilyaoti hududiy boshqarmasi, iqtisodiy kompleks rahbarlari, hokim yordamchilari hamda mahalliy tadbirkorlar ishtirok etdilar. Muloqot davomida tadbirkorlarga kompaniya tomonidan ko‘rsatiladigan xizmatlar, taqdim etiladigan kafilliklar, subsidiyalar va kompensatsiyalar haqida atroflicha ma’lumot berildi. Shuningdek, qaror va farmonlarda belgilangan tartibda kredit mablag‘larini ajratish va ulardan foydalanish bo‘yicha amaliy tavsiyalar ham taqdim etildi. Misol tariqasida, “ZARINA MARIYAM” MCHJ rahbari o‘zining “Nogironlik aravachalari, qo‘ltiqtayoqlar va maxsus vannalar ishlab chiqarish” loyihasini amalga oshirish jarayonida garov ta’minoti yetishmayotganini ma’lum qildi. Kompaniya mutaxassislari ushbu holatni o‘rganib chiqib, imtiyozli kreditning 50 foizi miqdorida kafillik berish bo‘yicha xulosalarini taqdim etdilar. Loyiha amalga oshirilgandan so‘ng, jami 6,2 mlrd. so‘m mahalliy va xorijiy investisiyalar o‘zlashtirilib, 30 ta yangi ish o‘rni yaratilishi rejalashtirilgan. Ushbu tashabbuslar Farg‘ona tumanida tadbirkorlik muhitini yanada yaxshilash, yangi ish o‘rinlarini tashkil etish va aholi farovonligini oshirishga xizmat qilmoqda.